ສາລະວັນ “ສີ່ພັນຂຸມ” ແຫຼ່ງທ່ອງທ່ຽວມະຫັດສະຈັນທາງທຳມະຊາດໜ້າຢ້ຽມຊົມ

ເມືອງລະຄອນເພັງ ແມ່ນ1 ໃນ 8 ເມືອງຂອງແຂວງ ສາລະວັນ, ໃນນັ້ນຖ້າເວົ້າເຖິງສະຖານທີ່ທ່ອງທ່ຽວພາຍໃນເມືອງລະຄອນເພັງແລ້ວ ກໍ່ມີຫລາຍບ່ອນທີ່ຫນ້າສົນໃຈ ໂດຍສະເພາະທາງດ້ານວັດທະນະທຳ ແລະ ທຳມະຊາດ,ຄຽງຄູ່ກັນນັ້ນ ປະຊາຊົນຊາວເມືອງ ລະຄອນເພັງ ຍັງເປັນຜູ້ທີ່ມີຈິດໃຈໂອບເອື້ອຍອາລີ, ມີຄວາມດຸຫມັ້ນຂະຫຍັນພຽງ, ຮັກ ແລະ ຫວງແຫນໃນມູນເຊື້ອທາງດ້ານມໍລະດົກວັດທະນະທຳອັນດີງາມ ກໍ່ຄືຂອງຊາດ. ການທ່ອງທ່ຽວ ທີ່ເມືອງ ລະຄອນເພັງ ຄັ້ງນີ້ ແມ່ນຈະນຳສະເຫນີ ສະຖານທີ່ທ່ອງ ທ່ຽວທາງທຳມະຊາດ ສິ່ງທີ່ເປັນຫນ້າອັດສະຈັນ ທີ່ເກີດຂື້ນຈາກການກັດເຊາະຂອງແມ່ນ້ຳຂອງ ນັ້ນກໍ່ແມ່ນ ປະຕິມາກຳແຫ່ງແມ່ນໍ້າຂອງ 4000 ຂຸມ ( ສີ່ພັນຂຸມ) ຫລື ທີ່ເຄີຍໄດ້ຍິນຝັ່ງໄທເອີ້ນກັນວ່າ 3000 ໂບກ, ແຕ່ຝັງລາວ ມີເຖິງ 4000 ຂຸມ.

ການທ່ອງທ່ຽວ 4000 ຂຸມ ເຫມາະສົມທີ່ສຸດ ແມ່ນໃນໄລຍະເດືອນ ມັງກອນ ເຖິງ ເດືອນ ມີຖຸນາ ໃນທຸກໆປີ ນ້ຳຂອງຈະບຸກແຫ້ງ ເຫລືອໄວ້ພຽງແຕ່ລານຫິນ ທີ່ກວ້າງໃຫຍ່ ແລະ ເຕັມໄປດ້ວຍຂຸມນ້ອຍ-ໃຫຍ່ ທີ່ສວຍງາມ ຄືກັບຜົນງານທາງປະຕິມາກຳ ທີ່ເກີດມາຈາກທຳມະຊາດ. ສ່ວນໄລຍະ ແຕ່ເດືອນ ກໍລະກົດ ຫາ ເດືອນ ທັນວາ ນ້ຳຂອງແມ່ນຈະຖ້ວມໃນບໍລິເວນດັ່ງກ່າວ. ການເດີນທາງມາທ່ອງທ່ຽວ ແຫລ່ງທ່ອງທ່ຽວດັ່ງກ່າວ ນັກທ່ອງທ່ຽວສາມາດ ຮ່ວມສ້າງກິດຈະກຳໃນຫລາຍຮູບແບບ ເປັນຕົ້ນການລົງຫລີ້ນນ້ຳ ເພື່ອຜ່ອນຄາຍຄວາມຮ້ອນ, ການຫາປາຕາມແມ່ນ້ຳ, ການຕັ້ງແຄ້ມພັກຜ່ອນ ຫລື ຮັບປະທານອາຫານ ທາມກາງທຳມະຊາດ

ສາລະວັນຖືເປັນອີກແຂວງໜຶ່ງທີ່ມີບັນດາແຫຼ່ງທ່ອງທ່ຽວສວຍງາມຫຼາກຫຼາຍແຫ່ງສາມາດສ້າງແຮງຈູງໃຈດຶງດູດເອົານັກທ່ອງທ່ຽວເຂົ້າມາທ່ຽວຊົມໄດ້ເປັນຢ່າງດີບໍ່ວ່າຈະເປັນທາງວັດທະນະທໍາ, ທໍາມະຊາດ ແລະປະຫວັດສາດ, ໃນນີ້ແຫຼ່ງທ່ອງທ່ຽວສີ່ພັນຂຸມບ້ານທ່ານັບວ່າ ເປັນອີກຜະລິດຕະພັນທ່ອງທ່ຽວ ຂອງແຂວງທີ່ໜ້າມະຫັດສະຈັນ ຊຶ່ງໄດ້ຮັບຄວາມສົນໃຈຈາກບັນດານັກທ່ອງທ່ຽວຢ່າງແຜ່ຫຼາຍເຊັ່ນກັນ.

ສໍາລັບແຫຼ່ງທ່ອງທ່ຽວສີ່ພັນຂຸມແຫ່ງນີ້ມີລັກສະນະທີ່ແປກຕາ ແລະໜ້າມະຫັດສະຈັນໃຈ, ເນື່ອງຈາກຫີນ ແຜນໃຫຍ່ຖືກນໍ້າເຈາະເຊາະເປັນເວລາຫຼາຍຮ້ອຍປີໄດ້ເກີດເປັນຂຸມນ້ອຍໃຫຍ່ນັບຫຼາຍພັນຂຸມ ແລະແຕ່ລະຂຸມ ຈະມີນໍ້າຂັງເໜືອນກັບວ່ານໍ້າສ້າງ ແລະນໍ້າຈະໃສເບິ່ງແລ້ວສວຍງາມສະອາດຕາ ເຊິ່ງໄດ້ມີຄໍາຊ່າລືອັນຫຼາກຫຼາຍແຕກຕ່າງກັນໄປກ່ຽວກັບ ປະຫວັດຄວາມເປັນມາຂອງສີ່ພັນຂຸມນີ້ ເຊິ່ງບໍ່ທັນມີຄວາມຈະແຈ້ງເທື່ອ, ປະຈຸບັນແມ່ນຢູ່ພາຍໃຕ້ການຄຸ້ມຄອງດູແລ ໂດຍກົງຈາກຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ເມືອງລະຄອນເພັງ ໂດຍສົມທົບກັບອົງການ ປົກຄອງບ້ານທ່າ.

ຢ່າງໃດກໍ່ຕາມ ຖ້າຫາກວ່ານັກ ທ່ອງທ່ຽວທ່ານໃດທີ່ສົນໃຈກໍສາມາດໄປທ່ຽວໄປຊົມກັນໄດ້ ເຊິ່ງນອກຈາກຈະມີຂຸມຈໍານວນຫຼາຍໃຫ້ໄດ້ຊົມກັນແລ້ວບໍລິເວນອ້ອມຮອບເຂດ ດັ່ງກ່າວຍັງເຕັມໄປດ້ວຍພູຜາປ່າໄມ້ຂຽວສົດງົດງາມອັນລ້ວນແລ້ວແຕ່ ຜະລິດສາຍລົມໃຫ້ມີອາກາດເຢັນສົດຊື່ນຢູ່ຕະຫຼອດເວລາ, ຍິ່ງຖ້າໄດ້ ຖ່າຍພາບໄວ້ເປັນທີ່ລະນຶກກັບສິ່ງແວດລ້ອມຄຽງຄູ່ກັບຂຸມຫີນທີ່ໜ້າອັດສະຈັນແລ້ວຍິ່ງຈະສ້າງຄວາມຊົງຈໍາທີ່ຍາກຈະລືມໄດ້, ເອົາເປັນວ່າຖ້າມີໂອກາດໄດ້ເດີນທາງໄປທາງພາກໃຕ້ກໍຢ່າງລືມໄປແວ່ຊົມກໍແລ້ວກັນເຊື່ອແນ່ວ່າທ່ານຈະປະທັບໃຈຢ່າງແນ່ນອນ.