ຄະນະໂຄສະນາອົບຮົມເມືອງຄົງເຊໂດນ ເປີດຮຽນກົດລະບຽບພັກປະຊາຊົນ ປະຕິວັດລາວ ໃຫ້ແກ່ມະຫາຊົນຜູ້ທີ່ມີຄວາມກ້າວໜ້າ.

12

ໃນຕອນບ່າຍ ຂອງວັນທີ 20 ເມສາ 2021 ນີ້,   ຄະນະໂຄສະນາອົບຮົມເມືອງຄົງເຊໂດນ ໄດ້ເປີດຮຽນກົດລະ ບຽບພັກປະຊາຊົນ ປະຕິວັດລາວ ຂື້ນທີ່ສະໂມສອນຂອງເມືອງ ໃຫ້ແກ່ມະຫາຊົນກ້າວໜ້າ ຜູ້ທີ່ມີຄວາມກ້າວໜ້າ ຈາກໜ່ວຍພັກອອ້ມຂ້າງເມືອງ ມີຈໍານວນມະຫາຊົນ ເຂົ້າຮຽນທັງໝົດ 28 ສະຫາຍ,ຍີງ 10 ສະຫາຍ, ໂດຍໃຫ້ກຽດເປັນປະທານ ແລະ ບັນຍາຍເອກະສານ ຂອງສະຫາຍ ຄຳພຸດ ພວງປັນຍາ  ກຳມະການພັກເມືອງ, ຫົວໜ້າ

ຄະນະໂຄສະນາອົບຮົມເມືອງຄົງເຊໂດນ ເອກະສານເຊື່ອມຊຶມໃນຄັ້ງນີ້ ໄດ້ນໍາເອົາເນື້ອໃນເອກະສານກົດລະບຽບພັກປະຊາຊົນ ປະຕິວັດລາວ ສະໄໝທີ X ເປັນຕົ້ນແມ່ນ: + ພື້ນຖານກ່ຽວກັບການກໍ່ສ້າງພັກ; ປະກອບມີ 14 ໝວດ 58 ມາດຕາ. ບັນດາ​ເນື້ອ​ໃນ​ພື້ນຖານ​ກ່ຽວກັບ​ການກໍ່ສ້າງ​ພັກ, ພັກ​ປະຊາຊົນ​ປະຕິວັດ​ລາວ​ແມ່ນ​ກອງ​ນຳໜ້າທີ່​ມີ​ການຈັດ​ຕັ້ງ ​ແມ່ນ​ອົງການ​ຈັດ​ຕັ້ງ​ການ​ເມືອງ​ສູງ​ສຸດ ຂອງ​ຊົນ​ຊັ້ນ​ກຳມະກອນ ​ແລະ ຂອງ​ລະບອບ​ປະຊາທິປະ​ໄຕ​ປະຊາຊົນ​ລາວ, ​ເປັນ​ຕົວ​ແທນ​ທີ່​ຈົ່ງ​ຮັກ​ພັກດີ ຢ່າງ​ສະ​ເໝີຕົ້ນ​ສະ​ເໝີປາຍ ຕໍ່ສິດ ​ແລະ ຜົນ​ປະ​ໂຫຍ​ດຂອງ​ຊົນ​ຊັ້ນກຳມະກອນ​ລາວ, ຊາວ​​ຜູ້​ອອກ​ແຮງ​ງານ ​ແລະ ຂອງ​ຊາດ​ລາວ​, ພັກ​ປະຊາຊົນ​ປະຕິວັດ​ລາວ ສ້າງ​ຕັ້ງ​ຂື້ນ​ໃນ​ວັນ​ທີ 22 ມີນາ ​ປີ 1955 ​ໂດຍ​ການ​ສືບ​ທອດ​ພາລະກິດ ​ຂອງ​ພັກ​ກອມ​ມູນິດ​ອິນດູ​ຈີນ ​ເຊີ່ງ ​ແມ່ນ​ປະທານ ​ໄກ ສອນ ​ພົມ ວິຫານ ​ເປັນຫຼັກ​ແຫຼ່ງ​ໃນ​ການ​ນຳພາ​ກໍ່ຕັ້ງ, ທະນຸ​ບຳລຸງ, ຝຶກ​ຝົນຫຼໍ່ຫຼອມ ​ແລະ ກໍ່ສ້າງ, ພັກ​ປະຊາ ຊົນ​ປະຕິວັດ​ລາວ​ ປະກອບ​ດ້ວຍ​ບຸກ ຄົນ ທີ່​ຕື່ນ​ຕົວ, ຫ້າວຫັນ​ປະຕິວັດ, ດີ​ເດັ່ນ​ກ່ວາໝູ່ ​ ແລະ  ​ໄດ້​ຮັບ​ຄວາມ​ໄວ້​ວາງ​ໃຈ ,​ ກ່ວາໝູ່ໃນ​ຊົນ​ຊັ້ນ​ກຳມະ ກອນ, ປັນຍາ​ຊົນ ​ແລະ ຊັ້ນ​ຄົນ​ອອກ​ແຮງ​ງານ​ໃນ​ເຜົ່າ​ຕ່າງໆ ເຊີ່ງ​ໄດ້​ຜ່ານ​ການ​ທົດ​ສອບ ​ໃນ​ຂະ​ບວນການ​ປົກ​ປັກ​ຮັກສາ ແລະ ພັດທະນາ​ປະ​ເທດ​ຊາດ ມີ​ຄວາມສະໜັກ​ໃຈ, ​ເຂົ້າ​ໃນ​ອົງການ​ຈັດ​ຕັ້ງ​ຂອງ​ພັກ, ຢ່າງ​ສຸດ​ກົກ​ສຸດ​ປາຍ. – ວັດຖຸປະສົງຂອງພັກປະຊາຊົນປະຕິວັດລາວ ແມ່ນນຳພາປວງຊົນລາວທັງຊາດ ດຳເນີນພາລະກິດປ່ຽນແປງໃໝ່ຮອບດ້ານ ທີ່ມີຫຼັກການຂອງພັກ, ປົກປັກຮັກສາປະເທດຊາດໄວ້ໃຫ້ໝັ້ນຄົງ, ກໍ່ສ້າງລະບອບປະຊາທິປະໄຕປະຊາຊົນ ໃຫ້ບັນລຸຕາມຈຸດໝາຍສັງຄົມນິຍົມ, ສ້າງປະເທດລາວ ໃຫ້ເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.- ​ເງື່ອນ​ໄຂ​ຜູ້​ທີ່​ຈະ​ຂະຫຍາຍ​ເຂົ້າ​ເປັນ​ສະມາຊິກ​ພັກ​

ປະຊາຊົນ​ປະຕິວັດ​ລາວ​ມີ​ດັ່ງ​ນີ້: ແມ່ນ​ພົນລະ​ເມືອງ​ລາວ​ທີ່​ມີ​ອາຍຸ​ແຕ່ 18 ປີ​ຂື້ນ​ໄປ ​ເຊີ່ງ​ຜ່ານ​ການ​ຝຶກ​ຝົນຫຼໍ່ຫຼ​ອມ​ໃນ​ຂະ​ບວນການ​ປະຕິວັດຂອງ​ມະຫາຊົນ, ມີ​ຜົນງານ​ດີ​ເດັ່ນ ​ໄດ້​ຮັບ​ຄວາມ​ເຊື່ອ​ຖື ​ແລະ ​ໄວ້​ວາງ​ໃຈ​ຈາກ​ມະຫາ ຊົນ, ​ແມ່ນ​ຜູ້​ທີ່​ມີ​ຄວາມ​ຕື່ນ​ຕົວ​ທາງ​ດ້ານ​ການ​ເມືອງ ຕາມ​ອຸດົມ​ຄະຕິ​ຂອງ​ພັກ, ຜ່ານ​ການ​ທົດ​ສອບ​ໃນ​ວຽກງານ​ຕົວ​ຈີ​ງ, ເຮັດ​ສຳ​ເລັດໜ້າທີ່ ທີ່​ພັກ ​ແລະ ການ​ຈັດ​ຕັ້ງ​ມອບໝາຍ​ໃຫ້, ​ແມ່ນ​ຜູ້​ທີ່​ມີ​ຊີວະ​ປະຫວັດ​ຈະ​ແຈ້ງ ຂາວ​ສະອາດ, ມີ​ຄຸນ​ທາດ​ການ​ເມືອງ, ໜັກ​ແໜ້ນ, ມີ​ຄຸນສົມບັດ​, ສິນ​ທຳ​ປະຕິວັດ, ມີ​ຄວາມ​ຮູ້, ຄວາມ​ສາມາດ, ມີ​ສຸຂະພາບ​ດີ ​ແລະ ​ເປັນ​ແບບຢ່າງ​ນຳໜ້າ​ໃນ​ຂະ​ບວນການ​ຂອງ​ມະຫາຊົນ, ແມ່ນ​ຜູ້​ທີ່​ຕື່ນ​ຕົວ​ສະໝັກ​ໃຈ ​ເຂົ້າ​ເປັນ​ສະມາຊິກ​ພັກ, ຍິນ​ດີ​ປະຕິບັດ​ກົດ​ລະບຽບພັກ, ​ໂຄງການ ການ​ເມືອງ​ຂອງ​ພັກ, ເຂົ້າ​ຮ່ວມ​ດຳ​ເນີນ​ຊີວິດ​ການ​ເມືອງ​ ຢູ່​ໃນ​ການຈັດ​ຕັ້ງ​ຮາກ​ຖານ​ພັກ ແລະ ເສຍເງີ​ນສະຖິຕິ​ພັກ​ເປັນ​ປົກກະຕິ. ໃນທ້າຍ ພິທີ ຍັງໄດ້ມອບຮັບໃບຢັ້ງຢືນຂອງສະຫາຍ ຄໍາພຸດ ພວງປັນຍາ ກຳມະການພັກເມືອງ, ຫົວໜ້າຄະນະໂຄສະນາອົບຮົມເມືອງ ແລະ ຂຶ້ນຮັບມີບັນດາມະຫາຊົນຜູ້ທີ່ມີຄວາມກ້າວໜ້າ.

ແບ່ງປັນ