ເມືຶອງວາປີ ແຂວງສາລະວັນ ເລົ່າຄືນມູນເຊື້ອວັນສໍາຄັນ ຂອງພັກຂອງຊາດປະຈໍາເດືອນມີນາ

20

 ຄະນະໂຄສະນາອົບຮົມເມືອງວາປີ ໄດ້ຈັດພິທີປາຖະກະຖາ ຫວນຄືນປະຫວັດສາດ ວັນສ້າງຕັ້ງພັກປະຊາຊົນປະຕິວັດລາວ ( 22 ມີນາ 1955-22 ມີນາ 2021 )  ຄົບຮອບ 66 ປີ ຕິດພັນກັບການເລົ່າຄືນມູນເຊື້ອວັນແມ່ຍິງສາກົນ ( 8 ມີນາ 1910 – 8 ມີນາ 2021 ) ຄົບຮອບ 111 ປີ ຈັດຂຶ້ນໃນວັນທີ 11 ມີນາ 2021 ທີ່ສະໂມສອນໃຫຍ່ຂອງເມືອງ, ໃຫ້ບັນລະຍາຍເອກະສານວັນສ້າງຕັ້ງພັກປະຊາຊົນປະຕິວັດລາວ ໂດຍ ທ່ານ ດົມວິໄລ ທອງສະຫວັນ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ-ແນວຄິດ ແລະ ໃຫ້ກຽດບັນຍາຍເອກະສານວັນແມ່ຍິງສາກົນ ໂດຍທ່ານ ນາງ ວິໄລພອນ ໄຊຍະເສນ ກຳມະການພັກເມືອງ, ປະທານສະຫະພັນແມ່ຍິງເມືອງ ມີບັນດາກຳມະການພັກເມືອງ, ຫົວໜ້າ ແລະ ຮອງຫ້ອງການ, ພະນັກງານ-ລັດຖະກອນ ອ້ອມຂ້າງເມືອງເຂົ້າຮ່ວມ.

ທ່ານ ດົມວິໄລ ທອງສະຫວັນ ຮອງເລຂາພັກເມືອງ, ຜູ້ຊີ້ນໍາວຽກງານການເມືອງ-ແນວຄິດຍົກໃຫ້ເຫັນເຖິງປະຫວັດການກຳກຳເນີດ ພັກປະຊາຊົນປະຕິວັດລາວ

ຊາດລາວເປັນຊາດໜຶ່ງ ທີ່ມີປະຫວັດສາດອັນຍາວນານ,ມີມູນເຊື້ອໃນການຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ,ມີມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ. ປີ 1893 ຝຣັ່ງໄດ້ເຂົ້າມາຢຶດຄອງເອົາລາວເປັນຫົວເມືອງຂຶ້ນ, ປະຊາຊົນລາວຖືກກົດຂີ່ຂູດຮິດຢ່າງໜັກໜ່ວງ ແລະ ປ່າເຖື່ອນ,ຈິ່ງໄດ້ພາກັນລຸກຮື້ຂຶ້ນຕໍ່ຕ້ານແອກປົກຄອງ ຂອງພວກລ່າເມືອງຂຶ້ນຝຣັ່ງຢ່າງອົງອາດກ້າຫານ,ເປັນຂະບວນການຕໍ່ເນື່ອງ. ປີ 1930 ປະທານ ໂຮ່ຈິມິນ ໄດ້ສ້າງຕັ້ງພັກກອມມູນິດອິນດູຈີນຂຶ້ນ ເພື່ອນໍາພາຂະບວນການຕໍ່ສູ້ຂອງປະຊາຊົນຢູ່ອິນດູຈີນ. ປີ 1934 ອົງຄະນະພັກແຄວ້ນລາວ ກໍ່ໄດ້ຮັບການສ້າງຕັ້ງຂຶ້ນ,ເມື່ອມີພັກນໍາພາການຕໍ່ສູ້ຂອງປະຊາ ຊົນນັບມື້ນັບໄດ້ຮັບໄຊຊະນະເປັນກ້າວໆ ພັກເຮົາໄດ້ເດັດດ່ຽວນໍາພາປວງຊົນລຸກຮື້ຂຶ້ນຢຶດອໍານາດ,ຍາດເອົາອໍານາດການປົກຄອງໃນທົ່ວປະເທດ ຈາກກໍາມືຂອງພວກຟາດຊິດຍີ່ປຸ່ນ ແລະ ພວກລ່າເມືອງຂຶ້ນຝຣັ່ງ,ປະກາດຄວາມເປັນເອກະລາດຂອງປະເທດລາວຕໍ່ໂລກ ເມື່ອວັນທີ 22 ຕຸລາ 1945. ປີ 1955 ຕໍ່ໜ້າຄວາມຮຽກຮ້ອງຕ້ອງການໃໝ່ຂອງການປະຕິວັດ ໂດຍປະຕິບັດຕາມມະຕິກອງປະຊຸມໃຫຍ່ຄັ້ງທີ II ຂອງພັກກອມມູນິດອິນດູຈີ,ບັນດານັກກອມມູນິດລາວ ພາຍຫຼັງທີ່ໄດ້ກະກຽມມາໄດ້ໄລຍະໜຶ່ງກໍ່ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດ ສ້າງຕັ້ງພັກປະຕິວັດຂອງຕົນຂຶ້ນໃນວັນທີ 22 ມີນາ 1955 ແລະ ພັກກໍ່ຳດ້ນໍາພາຕໍ່ສູ້ຍາດເອົາໄຊຊະນະ ຈົນໄດ້ຮັບເອກະລາດ ແລະ ສາມາດສະຖາປະນາ ປປລາວ ຂຶ້ນໃນວັນທີ 2 ທັນວາ 1975.

ທ່ານ ວິໄລພອນ ໄຊຍະເສນ ກຳມະການພັກເມືອງ, ປະທານສະຫະພັນແມ່ຍິງເມືອງ ຍົກໃຫ້ເຫັນເຖິງປະຫວັດຄວາມເປັນມາຂອງວັນແມ່ຍິງສາກົນ ແລະ ຜົນງານການເຄື່ອນໄຫວໃນແຕ່ລະໄລຍະ ທີ່ຜ່ານຜ່າດ້ວຍຄວາມທຸກຍາກລຳບາກຂອງແມ່ຍິງໃນເມື່ອກ່ອນ, ຜົນງານ ແລະ ໄຊຊະນະ ຕະຫຼອດໄລຍະເວລາ 111 ປີທີ່ຜ່ານມາຂອງແມ່ຍິງສາກົນ. ວັນທີ 8ມີນານັ້ນແມ່ນເຫດການການເມືອງທີ່ສຳຄັນ, ໃນທ່າມກາງສະພາບເສດຖະກິດຂອງພວກສັກດີນາ ແລະ ນາຍທືນມີການຂະຫຍາຍຕົວ ຍິ່ງເພີ່ມຄວາມຍາກລຳບາກໃຫ້ແກ່ຊາວຜູ້ອອກແຮງງານໂດຍສະເພາະແມ່ນກຳມະກອນແມ່ຍິງຢູ່ພາຍໃຕ້ລະບອບສັກດີນາ ທີ່ຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ. ນອກນັ້ນແມ່ຍິງຍັງຖືກຕີລາຄາຖືເປັນສີນຄ້າຂອງພວກນາຍທືນ, ຖືກທຸບຕີທາລຸນ. ຍ້ອນເຫດນັ້ນຈື່ງເປັນຂີດໝາຍໄຊຊະນະອັນເປັນພື້ນຖານຂອງຂະບວນການແມ່ຍິງສາກົນ ໃນການລຸກຂື້ນຕໍ່ສູ້ທວງເອົາສິດສະເໝີພາບ, ຄວາມຍຸດຕິທຳຈາກພວກສັກດິນານາຍທືນມາສູ່ຊາວກຳມະກອນຍິງ ແລະ ເດັກນ້ອຍໃນຫຼາຍຍຸກ, ຫຼາຍສະໄຫມ. ມາເຖິງວັນທີ 8 ມີນາ 1910 ຂະບວນການຕໍ່ສູ້ຂອງແມ່ຍິງໄດ້ແຜ່ຂະຫຍາຍອອກໄປສູ່ປະເທດນາຍທືນຢູ່ທະວີບເອີຣົບ ແລະ ໃນປີນີ້ ກອງປະຊຸມສາກົນກ່ຽວກັບບັນຫາແມ່ຍິງຄັ້ງທຳອິດ ໄດ້ຈັດຂຶ້ນຢູ່ນະຄອນຫຼວງໂກເປນຮາກ ປະເທດເດັນມາກ, ມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ ກອງປະຊຸມດັ່ງກ່າວໄດ້ຮັບຮອງ ແລະຕົກລົງເອົາວັນທີ 8 ມີນາຂອງທຸກປີເປັນວັນແມ່ຍິງສາກົນ.

ແບ່ງປັນ