ແຂວງສາລະວັນ ລາຍງານວຽກງານຮອບດ້ານ ໃນບັ້ນກະກຽມເລືອກຕັ້ງ ສສຊ ຊຸດທີ IX, ສສຂ ຊຸທີ II ຕໍ່ກຳມະການເລືອກຕັ້ງລະດັບຊາດ

73

ໃນວັນທີ 9 ກຸມພາ 2021 ທີ່ຫ້ອງວ່າການແຂວງ ຄະນະກຳມະການເລືອກຕັ້ງຂັ້ນແຂວງ ໄດ້ຕ້ອນການມາຢ້ຽມຢາມ ແລະ ເຮັດວຽກ ທ່ານ ນາງ ດຣ ອິນລາວັນ ແກ້ວບຸນພັນ ກໍາມະການກົມການເມືອງສູນກາງພັກ, ປະທານສູນກາງສະຫະພັນແມ່ຍິງລາວ, ກຳມະການເລືອກຕັ້ງລະດັບຊາດ, ອະນຸກໍາມະການໂຄສະນາ, ປຸກລະດົມຂະບວນການລະດັບຊາດ ພ້ອມດ້ວຍຄະນະ ທີ່ໄດ້ລົງມາຕິດຕາມ, ຊຸກຍູ້ວຽກງານເລືອກຕັ້ງ ສສຊ ຊຸດທີ 9 ແລະ ສສຂ ຊຸດທີ 2 ຢູ່ແຂວງສາລະວັນ. ໃນກອງປະຊຸມມີບັນດາທ່ານ ຄະນະກຳມະການເລືອກຕັ້ງຂັ້ນແຂວງ,  ຢູ່ບັນດາທ່ານ ໃນອະນຸກຳມະການໂຄສະນາ, ປຸກລະດົມຂະບວນການຂັ້ນແຂວງ ຜູ້ປະຈໍາການ ເຂົ້າຮ່ວມ. ໃນກອງປະຊຸມຄັ້ງນີ້ ທ່ານ ຄໍາເຫຼັກ ອິນດາວົງ ປະທານສະພາປະຊົນແຂວງ, ຄະນະກຳມະການເລືອກຕັ້ງຂັ້ນແຂວງ ຜູ້ປະຈໍາການ ໄດ້ລາຍງານວຽກງານຮອບດ້ານໃນບັ້ນກະກຽມການເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ  ສະພາປະຊາຊົນແຂວງ ຊຸດທີ 2 ປະຈໍາເຂດເລືອກຕັ້ງທີ 14 ແຂວງສາລະວັນ ຕໍ່ກອງປະຊຸມ. ທ່ານໃຫ້ຮູ້ວ່າ: ແຕ່ງຕັ້ງອະນຸກໍາມະການຊ່ວຍວຽກຂັ້ນແຂວງ ປະກອບມີ 05 ອະນຸກຳມະການ ຄື: ອະນຸກຳມະການເລຂານຸການ, ອະນຸກໍາມະການໂຄງປະກອບ ແລະ ບຸກຄະລາກອນ, ອະນຸກຳມະການໂຄສະນາ, ປຸກລະດົມຂະບວນການ, ອະນຸກໍາມະການປ້ອງກັນຊາດ-ປ້ອງກັນຄວາມສະຫງົບ, ອະນຸກໍາມະການງົບປະມານ; ມີຄະນະກຳມະການເລືອກຕັ້ງຂັ້ນເມືອງ ໃນ 8 ຕົວເມືອງ ແລະ ອະນຸກໍາມະການຊ່ວຍວຽກຂັ້ນເມືອງ, ນອກນັ້ນ ບັນດາອະນຸກຳມະການຕ່າງໆ ຍັງໄດ້ແຕ່ງຕັ້ງຜູ້ຊ່ວຍວຽກເພີ່ມເຕີມ ພາຍໃນອະນຸກຳມະການຂອງຕົນອີກຈຳນວນໜຶ່ງ.

ດ້ານສະຖິຕິ: ຄະນະກຳມະການເລືອກຕັ້ງຂັ້ນແຂວງ ຂອງແຂວງສາລະວັນ ມີຈຳນວນ 13 ທ່ານ ຍິງ 01 ທ່ານ ແລະ ຄະນະປະຈໍາການ ຄະນະກໍາມະການເລືອກຕັ້ງຂັ້ນແຂວງ ມີທັງໝົດ 11 ທ່ານ, ຍິງ 01 ທ່ານ; ອະນຸກໍາມະການຊ່ວຍວຽກ ຄະນະກໍາມະການເລືອກຕັ້ງຂັ້ນແຂວງ ມີທັງໝົດ 54 ທ່ານ; ໜ່ວຍງານຊ່ວຍວຽກຂອງອະນຸກໍາມະການເລືອກຕັ້ງຂັ້ນແຂວງ ມີທັງໝົດ 31 ທ່ານ; ຄະນະກໍາມະການເລືອກຕັ້ງຂັ້ນເມືອງ ມີຈໍານວນ 110 ທ່ານ; ອະນຸກໍາມະການຊ່ວຍວຽກຄະນະກໍາມະການເລືອກຕັ້ງຂັ້ນເມືອງ 427 ທ່ານ; ຄະນະຮັບຜິດຊອບໜ່ວຍປ່ອນບັດ 3.557 ທ່ານ; ໜ່ວຍງານປ້ອງກັນ ຫີບບັດ 2.204 ທ່ານ; ການເກັບກໍາສະຖິຕິພົນລະເມືອງເບື້ອງຕົ້ນ ມີຈໍານວນພົນລະເມືອງທັງໝົດ 443.456 ຄົນ, ຍິງ 223.570 ຄົນ, ໃນນັ້ນ, ຜູ້ມີສິດບ່ອນບັດເລືອກຕັ້ງຕົວຈິງ ຈໍານວນ 225.795 ຄົນ, ຍິງ 113.390ຄົນ; ໜ່ວຍປ່ອນບັດເລືອກຕັ້ງທົ່ວແຂວງ ມີຈໍານວນ 358 ໜ່ວຍ, ມີຫີບບັດລົງຄະແນນສຽງເລືອກຕັ້ງ ທັງໝົດ 716 ຫີບບັດ, ໃນນັ້ນ, ຫີບບັດລົງຄະແນນສຽງເລືອກຕັ້ງສະມາຊິກສະພາແຫ່ງຊາດ ຈໍານວນ 358 ຫີບບັດ, ຫີບບັດລົງຄະແນນສຽງເລືອກຕັ້ງສະມາຊິກສະພາປະຊາຊົນແຂວງ ຈໍານວນ 358 ຫີບບັດ.

ສະພາບການຈັດຕັ້ງປະຕິບັດວຽກງານດ້ານຕ່າງໆໃນໄລຍະຜ່ານມາ

  1. ໄດ້ສໍາເລັດການອອກຂໍ້ຕົກລົງແຕ່​ງຕັ້ງຄະນະກຳມະການເລືອກຕັ້ງຂັ້ນແຂວງ; ແຕ່ງ​ຕັ້ງອະນຸກໍາມະການຊ່ວຍວຽກຂັ້ນແຂວງ; ໄດ້ອອກມະຕິແບ່ງຄວາມຮັບຜິດຊອບໃຫ້ແຕ່ລະອະນຸກໍາມະການ ຂອງຄະນະກໍາມະການເລືອກຕັ້ງຂັ້ນແຂວງ, ມະຕິວ່າດ້ວຍການຈັດຕັ້ງ ແລະການເຄື່ອນໄຫວຂອງໜ່ວຍງານຊ່ວຍວຽກບັນດາອະນຸກໍາມະການຂອງຄະນະກໍາມະການເລືອກຕັ້ງຂັ້ນແຂວງ; ອອກ​ຂໍ້​ຕົກ​ລົງ​ກ່ຽວ​ກັບ​ການ​ປະ​ສານ​ງານ​ເພື່ອ​ຮັບ​ປະ​ກັນ​ວຽກ​ງານ​ເລືອກ​ຕັ້ງ ສ​ສ​ຊ ຊຸດ​ທີ IX ແລະ ສ​ສ​ຂ ຊຸດ​ທີ II;
  2. ໄດ້ສໍາເລັດການສ້າງແຜນດໍາເນີນງານ ຂອງຄະນະກໍາມະການເລືອກຕັ້ງຂັ້ນແຂວງ ເພື່ອດໍາເນີນການເລືອກຕັ້ງ, ແຜນດໍາເນີນງານຂອງແຕ່ລະອະນຸກໍາມະການເລືອກຕັ້ງຂັ້ນແຂວງ ແລະ ຂັ້ນເມືອງ;
  3. ໄດ້ສໍາເລັດອອກແຈ້ງການໃຫ້ອະນຸກໍາມະການເລືອກຕັ້ງຂັ້ນແຂວງ, ເມືອງ 8 ຕົວເມືອງ ຕາມຄວາມຮັບຜິດຊອບຂອງພາກສ່ວນກ່ຽວຂ້ອງເປັນຕົ້ນ: ກ່ຽວກັບການຂຶ້ນບັນຊີລາຍຊື່ຄວາມຕ້ອງການວັດຖຸ ແລະອຸປະກອນຮັບໃຊ້, ການກໍານົດໜ່ວຍປ່ອນບັດເລືອກຕັ້ງ, ການກະກຽມວຽກງານເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II;
  4. ໄດ້ອອກແຈ້ງການໃຫ້ຄະນະກໍາມະການເລືອກຕັ້ງຂັ້ນເມືອງ 8 ເມືອງ ກ່ຽວກັບ ການມອບຄວາມຮັບຜິດຊອບໃຫ້ບັນດາເມືອງ ຜະລິດຫີບບັດ ສສຊ, ສສຂ ແລະຜ້າສາກໃນພິທີປ່ອນບັດເລືອກຕັ້ງ;
  5. ໄດ້ອອກຄໍາແນະນໍາໃຫ້ 8 ເມືອງ ກ່ຽວກັບ ການແຕ່ງຕັ້ງຄະນະກໍາມະການເລືອກຕັ້ງ ແລະຄະນະຮັບຜິດໜ່ວຍປ່ອນບັດຂັ້ນເມືອງ; ການດໍາເນີນການປ່ອນບັດ, ການນັບຄະແນນ, ການປະກາດຜົນການເລືອກຕັ້ງ, ການແຕ່ງຕັ້ງຄະນະອະນຸກໍາມະການ ປກຊ-ປກສ, ຄະນະຮັບຜິດຊອບໜ່ວຍງານປ້ອງກັນການເລືອກຕັ້ງຢູ່ຂັ້ນເມືອງ 8 ເມືອງ;
  6. ອອກຄໍາແນະນໍາກ່ຽວກັບການໂຄສະນາຫາສຽງໃຫ້ຜູ້ມີສິດເລືອກຕັ້ງ ເປັນ ສສຊ ຊຸດທີ IX ແລະ ສສຂ ຊຸດທີ II; ຄໍາແນະນໍາກ່ຽວກັບການໂຄສະນາ ແລະປຸກລະດົມຂະບວນການໃນບັ້ນເລືອກຕັ້ງ; ໄດ້ອອກແຈ້ງການໃຫ້ພະແນກການອ້ອມຂ້າງແຂວງ; ຄະນະກໍາມະການເລືອກຕັ້ງຂັ້ນເມືອງ 8 ເມືອງກ່ຽວກັບການໂຄສະນາປຸກລະດົມຂະບວນການບັ້ນເລືອກຕັ້ງ;
  7. ສໍາເລັດການຝຶກອົບຮົມວຽກງານເລືອກຕັ້ງ ຢູ່ຂັ້ນແຂວງ ແລະຂັ້ນເມືອງ 8 ເມືອງທົ່ວແຂວງ;
  8. ສໍາເລັດການລົງຊຸກຍູ້ວຽກງານຮອບດ້ານເພື່ອກະກຽມໃຫ້ແກ່ການເລືອກຕັ້ງຢູ່ 8 ເມືອງທົ່ວແຂວງ;
  9. ໄດ້ຕິດຕາມການຕິດປ້າຍຢາຍຄໍາຂວັນຕ່າງໆຢູ່ຂັ້ນແຂວງ ແລະຂັ້ນເມືອງ ສໍາເລັດ 100%;
  10. ສໍາເລັດການກໍານົດຈຸດລົງໂຄສະນາຫາສຽງ ສສຊ, ສສຂ ແລະໄລຍະທາງໃນແຕ່ລະຈຸດຂອງການລົງຫາສຽງ ທົ່ວແຂວງ 131 ຈຸດ ໃນນັ້ນ: ຈຸດໂຄສະນາຫາສຽງ ຂອງ ສສຊ ມີ 23 ຈຸດ ແລະ ສສຂ ມີ 108 ຈຸດ;
  11. ສໍາເລັດການສ້າງແຜນໂຄສະນາຫາສຽງ ຂອງຜູ້ລົງສະໜັກຮັບເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II;
  12. ສໍາເລັດການສ້າງແຜນປ້ອງກັນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ເປັນຕົ້ນ: ການຈັດວາງ​ກໍາ​ລັງ, ຈັດ​ຕັ້ງເວນຍາມຕາມຈຸດຕ່າງໆສໍາຄັນ ເຊັ່ນ: ຂົວ, ​ເສັ້ນທາງ, ​ບໍ​ລິ​ເວນບ້ານ, ກຸ່ມບ້ານ, ເຂດປ່ອນບັດ, ເຂດຊາຍແດນ, ຈຸດ​ຫຼໍ່​ແຫຼມຕ່າງໆ ເພື່ອປ້ອງກັນການເລືອກຕັ້ງ ໃຫ້ມີຄວາມສະຫງົບຮັບປະກັນຄວາມປອດໄພໃຫ້ໄດ້ 100%;
  13. ໄດ້ສໍາເລັດການຈັດແບ່ງງົບປະມານ ໃຫ້ບັນດາອະນຸກໍາມະການເລືອກຕັ້ງຂັ້ນແຂວງ ແລະ ຂັ້ນເມືອງ ປະຈໍາງວດ II ເພື່ອຮັບໃຊ້ເຂົ້າໃນການຈັດຕັ້ງປະຕິບັດວຽກງານໃນບາດກ້າວທີ II;
  14. ສໍາເລັດການປະກາດຈໍານວນຜູ້ມີສິດປ່ອນບັດເລືອກຕັ້ງທົ່ວແຂວງ ມີຈໍານວນພົນມີໜ້າຕົວຈິງຕາມສໍາມະໂນຄົວ ຈໍານວນ 225.795 ຄົນ, ຍິງ 113.390 ຄົນ;
  15. ສໍາເລັດການປະກາດລາຍຊື່ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະສະມາຊິກສະພາປະຊາຊົນແຂວງ ຊຸດທີ II, ຜູ້ລົງສະໝັກຮັບເລືອກຕັ້ງເປັນ ສສຊ ມີຈໍານວນທັງໝົດ 12 ທ່ານ, ຍິງ 02 ທ່ານ ແລະ ມີຜູ້ລົງສະໝັກຮັບເລືອກຕັ້ງເປັນ ສສຂ ມີຈໍານວນທັງໝົດ 44 ທ່ານ, ຍິງ 12 ທ່ານ;
  16. ສໍາເລັດສະໜອງອຸປະກອນຕ່າງໆ ເພື່ອຮັບໃຊ້ໃຫ້ແກ່ການເລືອກຕັ້ງ ສສຊ ຊຸດທີ IX ແລະສສຂ ຊຸດທີ II ເປັນຕົ້ນ: ຈັດສົ່ງຮູບ, ປະຫວັດຂອງຜູ້ສະຫມັກຮັບເລືອກຕັ້ງເປັນສະມາຊິກສະພາປະຊາຊົນຂັ້ນແຂວງ, ບັດລົງຄະແນນສຽງເລືອກຕັ້ງສະມາຊິກສະພາປະຊາຊົນແຂວງ, ໃບຢັ້ງຢືນຜູ້ມີສິດປ່ອນບັດເລືອກຕັ້ງ, ກາຈໍ້າ ປະເພດຕ່າງໆ, ບິກເຝິດ, ນໍ້າຕາປະທັບ, ແອບກາຈໍ້າ ໃຫ້ແກ່ກໍາລັງ ປກຊ-ປກສ ທີ່ຈະດໍາເນີນການປ່ອນບັດເລືອກຕັ້ງ ໃນວັນທີ 13/02/2021 ແລະ  ບັນດາເມືອງ 8 ເມືອງທົ່ວແຂວງ;
  17. ສໍາເລັດການຮ່າງບົດກ່າວເປີດ-ກ່າວປິດ ໃນພິທີປ່ອນບັດເລືອກຕັ້ງໃຫ້ບັນດາເມືອງ;
  18. ສໍາເລັດການຮ່າງບົດບັນທຶກຜົນການປ່ອນບັດເລືອກຕັ້ງ ສສຊ ຊຸດທີ IX, ສສຂ ຊຸດທີ II ຂອງເມືອງ ແລະໜ່ວຍປ່ອນບັດ;

ນອກທ່ານ ຍັງໄດ້ ວາງທິດທາງແຜນການເຄື່ອນໄຫວໃນຕໍ່ໜ້າ  ດັ່ງນີ້:

  1. ຈັດຕັ້ງການໂຄສະນາຫາສຽງ ໃຫ້ຜູ້ສະຫມັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ II ໃນວັນທີ 9-19/02/2021;
  2. ດໍາເນີນການປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃນວັນທີ 21/02/2021;
  3. ສະຫຼຸບຄະແນນ ຂອງຜູ້ສະຫມັກຮັບເລືອກຕັ້ງ ເປັນສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໃຫ້ສໍາເລັດຊ້າສຸດວັນທີ 27/02/2021;
  4. ສືບຕໍ່ປະສານສົມທົບກັບຄະນະກໍາມະການເລືອກຕັ້ງລະດັບຊາດ ເພື່ອຈັດສັນງົບປະມານໃຫ້ຄະນະກໍາມະການເລືອກຕັ້ງຂັ້ນແຂວງ ແລະ ຂັ້ນເມືອງ, ເພື່ອນໍາໃຊ້ເຂົ້າໃນການຈັດຕັ້ງປະຕິບັດບັນດາຫນ້າວຽກທີ່ກໍານົດ ໄວ້ໃນບາດກ້າວທີ 4 ໂດຍໃຫ້ສໍາເລັດ.

           ໃນຕອນທ້າຍ ທ່ານ ນາງ ອິນລາວັນ ແກ້ວບຸນພັນ ກໍາມະການກົມການ ເມືອງ ສູນກາງພັກ, ປະທານສູນກາງສະຫະພັນແມ່ຍິງລາວ, ກຳມະການເລືອກຕັ້ງລະດັບຊາດ, ອະນຸກໍາມະການໂຄສະນາ, ປຸກລະດົມຂະບວນການລະດັບຊາດ ໄດ້ມີຄໍາເຫັນໂອ້ລົມ ບາງບັນຫາດັ່ງນີ້: ກ່ອນອື່ນທ່ານ ໄດ້ຍ້ອງຍໍຕໍ່ກາາການກະກຽມເລືອກຕັ້ງຂອງແຂວງ ທີ່ມີຜົນສໍາເລັດຫຼາຍດ້ານ. ນອກນັ້ນ, ທ່ານ ຍັງໄດ້ຮຽກຮ້ອງໃຫ້ຄະນະກຳມະການເລືອກຕັ້ງຂັ້ນແຂວງ ກໍ່ຄືອະນຸກຳມະການໂຄສະນາ, ປຸກລະດົມຂະບວນການຂັ້ນແຂວງ ການເລືອກຕັ້ງໃຫ້ຮັບປະກັນ 300/100. ກອງປະຊຸມຄັ້ງນີ້ ໄດ້ໃຊ້ເວລາ 1 ຄາບຈິ່ງປິດລົງດ້ວຍຜົນສໍາເລັດ.

ແບ່ງປັນ