ເສີມຂະຫຍາຍມູນເຊື້ອແຫ່ງການສ້າງຕັ້ງສະຫະພັນນັກລົບເກົ່າ

26

ເພື່ອເປັນການລະນຶກເຖິງຄຸນງາມຄວາມດີຂອງບັນພະບຸລຸດລາວກໍ່ຄືຜົນງານການຕໍ່ສູ້ກູ້ຊາດຂອງລາວ ຂອງນັກຮົບວິລະຊົນແຫ່ງຊາດລາວ ມາໃນເດືອນທ້າຍສິງຫາ 2019 ນີ້ ຄະນະໂຄສະນາອົບຮົມແຂວງ ຮ່ວມກັບສະຫະພັນນັກລົບເກົ່າແຂວງສາລະວັນ ໄດ້ຈັດພິທີປາຖະກະຖາເລົ່າຄືນມູນເຊື້ອແຫ່ງການສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 17 ປີ ( 9 ກັນຍາ 2002 – 9 ກັນຍາ 2019 ) ຂຶ້ນທີ່ສະໂມສອນຂອງຫ້ອງການສະຫະພັນນັກລົບເກົ່າແຂວງ ໂດຍໃຫ້ກຽດເປັນປະທານ ພ້ອມທັງເລົ່າມູນເຊື້ອ ຂອງທ່ານສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ ແລະ ມີບັນດາທ່ານ ກໍາມະການພັກແຂວງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ຫົວໜ້າແລະຮອງຫົວໜ້າພະແນກການພະແນການອ້ອມຂ້າງແຂວງ, ພ້ອມດ້ວຍພະນັກງານ-ລັດຖະກອນ ເຂົ້າຮ່ວມທັງໝົດ 69 ສະຫາຍ, ຍິງ 9 ສະຫາຍ. ໃນພິທີຄັ້ງນີ້, ທ່ານຫົວໜ້າຄະນະໂຄສະນາອົບຮົມແຂວງ ໄດ້ເລົ່າຄືນມູນເຊື້ອ ແລະ ຜົນງານ ອັນໃຫຍ່ຫລວງ ຂອງຖັນແຖວນັກຮົບເກົ່າ ໃນການຕໍ່ສູ້ເພື່ອກອບກູ້ເອົາຄວາມເປັນເອກະລາດ, ອຳນາດອະທິປະໄຕ, ການປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ ພ້ອມທັງສາຍວິດີໂອກ່ຽວກັບມູນເຊື້ອການເຄື່ອນໄຫວດັ່ງກ່າວ. ຈຸດປະສົງໃນການຈັດຕັ້ງປາຖະກະຖາຄັ້ງນີ້ ແມ່ນເພື່ອໃຫ້ພະນັກງານ-ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ເສີມຈະຫຍາຍທາດແທ້ມູນເຊື້ອປະຕິວັດ ແລະ ສຶກສາອົບຮົມຄົນຮຸ່ນໜຸ່ມ ແລະ ເພີ່ມທະວີກຳແໜ້ນຄຳຂວັນ 3 ດີ 6 ຮັກສາຂອງສາຫະພັນນັກຮົບເກົ່າແຫ່ງຊາດລາວ. ພິທີໄດ້ດໍາເນີນໄປເປັນເວລາ 1 ຄາບ ເລີ່ມແຕ່ 8:30 ໂມງຫາ 11:00 ໂມງ ຈິ່ງປິດລົງດ້ວຍຜົນສໍາເລັດຢ່າງຈົບງາມ.

ແບ່ງປັນ