ຄະນະໂຄສະນາອົບຮົມແຂວງເຊກອງ ພົບປະແລກປ່ຽນບົດຮຽນ ກັບຄະນະໂຄສະນາອົບຮົມແຂວງສາລະວັນ

ໃນທ້າຍເດືອນມິຖຸນາ 2019 ນີ້, ຄະນະຜູ້ແທນ ຄະນະໂຄສະນາອົບຮົມແຂວງເຊກອງ ໄດ້ມາຮ່ວມ ພົບປະແລກປ່ຽນຖອດຖອນບົດຮຽນກັບຄະນະໂຄສະນາອົບຮົມແຂວງສາລະວັນ ທີ່ຫ້ອງປະຊຸມຫ້ອງວ່າການແຂວງສາລະວັນ ໃນນັ້ນມີຄະນະຜູ້ແທນຈາກແຂວງເຊກອງ ຈໍານວນ 3 ທ່ານ, ຍິງ 2 ທ່ານ ແລະ ຄະນະຜູ້ແທນຈາກຄະນະໂຄສະນາອົບຮົມແຂວງ ແລະ ແຂກຖືກເຊີນ 13 ທ່ານ, ຍິງ 5 ທ່ານ. ໃນພິທີຄັ້ງນີ້, ທັງສອງຄະນະຜູ້ແທນ ແຂວງເຊກອງ – ສາລະວັນ ໄດ້ພົບປະແລກປ່ຽນບົດຮຽນວຽກງານຂໍ້ມູນຂ່າວສານ, ວຽກໂຄສະນາ-ປາຖະກະຖາ ແລະ ກອງໂຄສະນາເຄື່ອນທີ່. ທັງ ສອງຝ່າຍໄດ້ຜັນປ່ຽນກັນ ລາຍງານການເຄື່ອນໄຫວວຽກງານຂໍ້ມູນຂ່າວສານ ແລະ ການເຄື່ອນໄຫວໂຄສະນາປາຖະ ກະຖາ, ກອງໂຄສະນາເຄື່ອນທີ່ ແລະ ພ້ອມກັນແລກປ່ຽນປະກອບຄໍາເຫັນ ແລະ ຕອບແກ້ຕໍ່ຂໍ້ຄໍາຖານເຈາະຈີ້ມຢ່າງກົງໄປກົງມາ ແລະ ມີບັນຍາກາດຟົດຟື້ນ.ຈຸດປະສົງຂອງການພົບປະແລກປ່ຽນບົດຮຽນໃນວຽກນີ້ ແມ່ນເພື່ຶອນໍາເອົາບົດຮຽນທີ່ໄດ້ພົບປະນໍາໄປຈັດຕັ້ງຜັນຂະຫຍາຍ, ໂຄສະນາຜ່ານສື່ເລເລັກໂຕນິກຕ່າງໆ ເພື່ອຮັບປະກັນໂຄສະນາໃຫ້ດີ, ໃຫ້ຫຼາຍ ແລະ ໃຫ້ຖືກຕ້ອງກົດໝາຍ. ໃນຕອນທ້າຍ ທ່ານ ສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ ໄດ້ມີຄໍາເຫັນໂອ້ລົມຊີ້ທິດໃຫ້ສອງຄະນະ ຕ້ອງເອົາໃຈໃສ່ແລກປ່ຽນບົດຮຽນໃນດ້ານນີ້ ແລະ ທ່ານ ໄດ້ເນັ້ນໜັກ ໃຫ້ທັງສອງຄະນະຕ້ອງນໍາເອົາເນື້ອໃນຈິດໃຈ ທີ່ພົບປະແລກປ່ຽນໃນຄັ້ງນີ້ ນໍາໄປຈັດຕັ້ງປະຕິບັດໃນຕໍ່ໜ້າ. ໃນພິທີຄັ້ງນີ້, ໄດ້ມີການມອບຂອງທີ່ລະລຶກໃຫ້ກັນ. ພິທີຄັ້ງນີ້ໄດ້ໃຊ້ເວລາ 1 ຄາບ ຈິ່ງອັດລົງດ້ວຍຜົນສໍາເລັດຢ່າງຈົບງາມ.