ພະແນກສຶກສາທິການ ແລະ ກິລາແຂວງ ສາລະວັນ ເປີດຊຸດອົບຮົມແນວທາງຂອງພັກ ໃຫ້ຄູ-ອາຈານສອນວິຊາສັງຄົມ-ການເມືອງ

ມາໃນວັນທີ 25-27 ກໍລະກົດ 2018 ນີ້, ຄະນະໂຄສະນາອົບຮົມສູນກາງພັກ, ຄະນະໂຄສະນາອົບຮົມແຂວງ, ພະ ແນກສຶກສາທິການ ແລະ ກິລາແຂວງສາລະວັນ ໄດ້ຮ່ວມ ກັນຈັດຊຸດອົບຮົມ ແນວທາງຂອງພັກ ໃຫ້ແກ່ຄູ – ອາຈານສອນວິຊາສັງຄົມ -ການເມືອງ ຂຶ້ນທີ່ຫ້ອງປະຊຸມສູນໄອຊີທີ ຂອງໂຮງຮຽນ ມ ສ ສາລະວັນ ໂດຍໃຫ້ກຽດເປັນຄະນະປະທານ ຂອງທ່ານ ສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ທ່ານຄໍາເຄນ ຈັນທະວິໄລ ຫົວໜ້າກົມອົບຮົມ ຄະນະໂຄສະນາອົບ ຮົມສູນກາງພັກ ແລະ ທ່ານ ຄໍາເຝືອງ ອິນທະສອນ ຄະນະ ພັກ ພະແນກສຶກສາທິການ ແລະ ກິລາແຂວງ ໃນນັ້ນ ມີນັກສໍາມະນາກອນ ທັງໝົດ 30 ທ່ານ, ຍິງ 22 ທ່ານ; ມີສະ ມາຊິກພັກ 15 ສະຫາຍ, ຍິງ 10 ສະຫາຍ. ຕໍາແໜ່ງຮອງຜູ້ອໍານວຍການ 5 ທ່ານ, ຍິງ 1 ທ່ານ. ໃນຊຸດອົບຮົມນີ້ ໄດ້ນໍາເອົາຫຼັກສູດການຮຽນ-ການສອນ ລວມທັງໝົດ 9 ບົດ ມີນັກວິທະຍາກອນ ທັງໝົດ 8 ທ່ານ, ຍິງ 1 ທ່ານ ມາຈາກຄະນະໂຄສະນາອົບຮົມສູນກາງພັກ 2 ທ່ານ, ຍິງ 1 ທ່ານ; ຄະນະໂຄສະນາອົບຮົມແຂວງ 2 ທ່ານ, ພະແນກການອ້ອມຂ້າງແຂວງ 4 ທ່ານ. ເຊິ່ງໃນຊຸດອົບຮົມຄັ້ງນີ້, ໄດ້ເລີ່ມມາແຕ່ວັນທີ 25 ກໍລະກົດ ໂດຍແມ່ນທ່ານ ສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ ກ່າວເປີດຊຸດອົບຮົມຢ່າງເປັນທາງການ. ຫຼັງຈາກນັ້ນ, ທ່ານ ແລະ ບັນດານັກວິທະຍາກອນ ໄດ້ບັນລະຍາຍບົດ ທີຕົນຮັບຜິດຊອບ ພ້ອມທັງໄດ້ສົ່ງຄວາມຮູ້ຢ່າງກົງໄປກົງມາ ຈຸດປະສົງໃນການຈັດຊຸດອົບຮົມເທື່ອນີ້, ແມ່ນ ເພື່ອຍົກລະດັບຄວາມຮູ້ທາງດ້ານທິດສະດີ ແລະ ແນວທາງນະໂຍບາຍຂອງພັກ ໃຫ້ແກ່ຄູ-ອາຈານສອນວິຊາສັງຄົມ-ການເມືອງ. ເພື່ອໃຫ້ຄູສອນວິຊາສັງຄົມການເມືອງກຳແໜ້ນຕໍ່ແນວທາງນະໂຍບາຍຂອງພັກ, ມີຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ມີຄວາມຮັບຜິດຊອບສູງໃນການສຶກສາອົບຮົມນັກຮຽນຂອງຕົົນ ຮູ້ຮັກຊາດບ້ານເກີດເມືອງນອນ, ຮູ້ຮັກຜູ້ນໍາປະຕິວັດ ເພື່ອໃຫ້ກາຍເປັນຜູ້ສືບທອດທີ່ດີຂອງຊາດ. ທ້າຍຕອນທ້າຍພິທີ, ໄດ້ມີການມອບ-ຮັບໃບຢັ້ງຢືນ ແລະ ກ່າວປິດຂອງທ່ານ ສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ. ໃນພິທີຄັ້ງນີ້ ໄດ້ໃຊ້ເວລາ 3 ວັນຈຶ່ງອັດລົງດ້ວຍຜົນສໍາເລັດຢ່າງຈົບງາມ.