ເມືອງວາປີ ຈັດຕັ້ງກອງປະຊຸມສະຫຼຸບວຽກງານໂຄສະນາອົບຮົມທົ່ວແຂວງ ສາລະວັນ

63

ມາໃນຕອນເຊົ້າຂອງວັນທີ 17 ກໍລະກົດ 2018 ນີ້, ຄະນະໂຄສະນາອົບຮົມແຂວງ ສາລະວັນ ຮ່ວມກັບຄະນະໂຄສະນາອົບ ຮົມເມືອງ ວາປີ ໄດ້ຮ່ວມ ກັນຈັດຕັ້ງກອງປະຊຸມສະຫຼຸບ ວຽກງານໂຄສະນາອົບຮົມທົ່ວແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ພາຍໃຕ້ຫົວຂໍ້: ຍົກສູງຄຸນນະພາບວຽກງານໂຄສະນາອົບຮົມ ດ້ວຍການສ້າງພັກປອດໃສ, ເຂັ້ມແຂງ ແລະ ໜັກແໜ້ນ ຂຶ້ນທີ່ຫ້ອງປະຊຸມ ຂອງຫ້ອງວ່າການປົກຄອງເມືອງວາປີ ໂດຍໃຫ້ກຽດເປັນປະທານ ແລະ ກ່າວເປີດຂອງ ທ່ານ ສີເຮັງ ຫອມສົມບັດ ຄະນະປະຈໍາພັກແຂວງ, ຫົວໜ້າຄະນະໂຄສະ ນາອົບຮົມແຂວງມີທ່ານ ຫົວໜ້າ ແລະ ຮອງພະແນກການອ້ອມຂ້າງແຂວງ, ບັນດາທ່ານ ຄະນະປະຈໍາພັກເມືອງ,ຫົວໜ້າຄະນະໂຄສະນາອົບຮົມແຂວງ 8 ເມືອງ ແລະ ພະນັກງານ ຜູ້ທີ່ເຮັດວຽກງານໂຄສະນາຢູ່ຮາກຖານພັກ ອ້ອມຂ້າງເມືອງວາປີ ເຂົ້າຮ່ວມທັງໝົດ 105 ທ່ານ, ຍິງ 24 ທ່ານ ໃນກອງປະຊຸມຄັ້ງນີ້, ໃຫ້ກຽດກ່າວຕອນຮັບແຂກ ແລະ ຮັບຟັງສະພາບລາວຂອງເມືອງ ຂອງທ່ານ ກິແກ້ວ ໄຊຍະລາດ ຮອງເລຂາພັກເມືອງ, ຮອງເຈົ້າເມືອງ, ຫົວໜ້າຄະນະຈັດຕັ້ງເມືອງວາປີ. ໃນກອງປະຊຸມຍັງໄດ້ຮັບຟັງ ການຜ່ານບົດສະຫຼຸບ 6 ເດືອນຕົ້ນ ແລະ ທິດທາງແຜນການ 6 ເດືອນທ້າຍ ປີ 2018 ຂອງທ່ານ ຄໍາສິງ ແກ້ວອໍາພອນ ຮອງຫົວໜ້າຄະນະໂຄສະນາອົບຮົມແຂວງ. ຫຼັງຈາກນັ້ນ ມີບັນດາປະກອບຄໍາເຫັນໃສ່ບົດສະຫຼຸບຢ່າງມີຫຼັກການຂອງພັກ. ຈຸດປະສົງໃນການຈັດຕັ້ງກອງປະຊຸມເຄື່ອນທີ່ ຂອງວຽກງານໂຄສະນາອົບຮົມທົ່ວແຂວງນີ້ ແມ່ນເພື່ອປັບປຸງການໂຄສະນາໃນໄລຍະໃໝ່ ດ້ວຍ 3 ຕໍ ( ຕົວຈິງ, ຕົວຢ່າງ ແລະ ຕົວແບບ ), ນອກຈາກນນີ້ ຍັງເປັນການແລກປ່ຽນຖອກຖອນບົດຮຽນດ້ວຍກັນ ຂອງຜູ້ເຮັດວຍກງານໂຄສະນາທົ່ວແຂວງ ແລະ ເພື່ອຍົກສູງຄຸນນະພາບວຽກງານໂຄສະນາ ດ້ວຍການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ. ໃນຕອນທ້າຍ ກອງປະຊຸມຍັງໄດ້ຮັບຟັງການໂອ້ລົມຂອງທ່ານ ປະທານ. ໃນນັ້ນທ່ານ ໄດ້ເນັ້ນໜັກໃຫ້ຜູ້ເຮັດວຽກງານໂຄສະນາອົບຮົມ ຕ້ອງເອົາໃຈໃສ່ ແລະ ເປັນເຈົ້າການ ໃນການໂຄສະນາອົບຮົມແນວທາງຂອງພັກປະຊາຊົນປະຕິວັດລາວ ແລະ ພ້ອມກັນສະກັດກັ້ດ ຕ້ານການໂຄສະນາໃສ່ຮ້າຍປ້າຍສີ ຂອງກຸ່ມຄົນ ທີ່ບໍ່ຫວັງດີຕໍ່ພັກຕໍ່ລັດ ຂອງພວກເຮົາ. ກອງຄັ້ງນີ້ ໄດ້ດໍາເນີນໄປເປັນເວລາ 1 ຄາບ ເລີ່ມແຕ່ 8:30 ໂມງຫາ 12:00 ໂມງ ຈິ່ງປິດລົງດ້ວຍຜົນສໍາເລັດຢ່າງຈົບງາມ.

ແບ່ງປັນ